Bu gün Türk Dövlətləri Təşkilatı beynəlxalq aləmdə sürətlə böyüyən, regional sabitliyin və qlobal sülhün möhkəmləndirilməsində əsas aktora çevrilən nüfuzlu geosiyasi güc mərkəzidir.

"MemurTv.az"ın Şuşaya ezam olunan əməkdaşı xəbər verir ki, bunu TDT-yə üzv dövlətlərin dini məsələlər üzrə dövlət qurumları rəhbərlərinin Şuşa şəhərində keçirilən Birinci görüşündəki çıxışında Dini Qurumlarla İş üzrə Dövlət Komitəsinin sədri Ramin Məmmədov deyib.

Komitə sədri qonsqları Türk dünyasının mədəniyyət paytaxtı, Azərbaycanın şanlı Zəfərimizin rəmzi olan Şuşada salamlamaqdan mənunluğunu vurğulayıb:

"Şuşa həm də mənim doğma evim, uşaqlıq xatirələrimin yurdudur. Bu gün qardaşlarımı öz evimizdə, Qarabağda qarşılamaq mənə xüsusi bir qürur hissi yaşadır".

R.Məmmədov hazırda Türk Dövlətləri Təşkilatının (TDT) beynəlxalq aləmdə sürətlə böyüdüyünü, regional sabitliyin və qlobal sülhün möhkəmləndirilməsində əsas aktora çevrilən nüfuzlu geosiyasi güc mərkəzi olduğunu qeyd edib.

Dövlət Komitəsinin sədri TDT ölkələri arasında əlaqələrin qardaşlıq, qarşılıqlı etimad və strateji maraqlar üzərində qurulduğunu bildirib:

"Təşkilatımızın bu müstəviyə ucalmasında və qurumlararası koordinasiyanın təmin edilməsində TDT Katibliyinin və şəxsən hörmətli Kubanıçbek Ömüralıyevin çoxtərəfli əməkdaşlıq mexanizmlərinin gücləndirilməsi istiqamətindəki mühüm töhfələrini xüsusi qeyd etmək istəyirəm. Bu birliyin güclənməsinin arxasında dövlət başçılarımızın sarsılmaz siyasi iradəsi dayanır. Azərbaycan Prezidenti İlham Əliyevin rəhbərliyi ilə həyata keçirilən xarici siyasət kursunda Türk dünyasının inteqrasiyası əsas geostrateji hədəfimizdir. Dövlətimizin başçısının "Bizim bir ailəmiz var, o da Türk dünyasıdır" bəyanatı hər birimiz üçün rəhbər prinsipdir. Bu strategiya ortaq mənəvi-humanitar dəyərlər üzərində birliyimizi qorumağı və gələcəyə birgə addımlamağı nəzərdə tutur".

O, müasir dünyanın mədəni mənzərəsi sürətlə dəyişdiyini, bəşəriyyətin qlobal miqyasda bəzi Qərb dairələrində sistemli şəkildə yürüdülən anti-İslam tendensiyaları və yeni ideoloji təhdidlərlə üz-üzə qaldığını vurğulayıb:

"Bu gün İslam dinini terrorla eyniləşdirməyə çalışan, müqəddəs dəyərlərimizi hədəf alan bu təhlükəli meyllərə qarşı beynəlxalq müstəvidə ən qətiyyətli mübarizə aparan ölkələrdən biri Azərbaycandır. Bizim xalqlarımızın sahib olduğu tolerant dünyagörüşü əsrlər boyu birgəyaşayışdan doğan zəngin mənəvi prinsiplərin məhsuludur. Türk-İslam sivilizasiyası dünyaya hər zaman sülh, ədalət və humanizm bəxş edib".