Böyük Britaniyanın xüsusi xidmət orqanlarının nümayəndələri ölkənin Baş naziri Endi Börnhemə Rusiyanın birbaşa cavab tədbirləri ilə bağlı xəbərdarlıq ediblər.

“Qafqazinfo” xəbər verir ki, bu barədə məlumatı öz mənbələrinə istinadən “Daily Mail” yayıb.

Xəbərdarlığa əsasən, Rusiya Britaniyanın Ukraynaya dəstəyin gücləndirilməsinə birbaşa reaksiya verə, hətta ölkədə təhlükəsizlik obyektlərinə və silah zavodlarına hücum edə bilər.

“Daily Mail” yazır ki, rəsmi Moskva əvvəlcə Börnhemin sələfi Kir Starmerdən daha mülayim mövqe tutacağını güman edirdi, lakin onun Kiyevə səfəri və ölkələr arasında hərbi əməkdaşlığın gücləndirilməsi bu fikri dəyişdi.

Kəşfiyyat sahəsindən yüksəkvəzifəli mənbə isə Rusiyanın Böyük Britaniyanın müdafiə infrastrukturuna və təhlükəsizlik obyektlərinə hücumu “qaçılmaz” adlandırıb.

Onun sözlərinə görə, bu hücum NATO-nun hərbi cavabını tələb edən həddən aşağı miqyasda və pilotsuz uçuş aparatları, yanğın və ya kiberhücum şəklində ola bilər.

Xatırladaq ki, E.Börnhem avqustun 24-də Baş nazir postunda ilk xarici səfərini Ukraynanın paytaxtı Kiyevə edib.