Özbəkistan Jurnalistika və Kütləvi Kommunikasiyalar Universiteti (OzJOKU) və Bakı Dövlət Universiteti (BDU) yeni birgə layihənin icrasına başlayıb.

Bu barədə OzJOKU-nun rektoru Şerzodxon Kudratxoca Daşkənddə "MemurTv.az"ın müxbirinə müsahibəsində bildirib.

Onun sözlərinə görə, layihə magistratura səviyyəsində təhsil alan tələbələrə dəstəyi nəzərdə tutur. Xüsusilə elmi işlərin yazılması zamanı hər bir tələbənin Azərbaycan və Özbəkistandan olmaqla iki elmi rəhbəri olacaq.

"Ötən il mən Bakı Dövlət Universitetində oldum. İlk növbədə, biz magistrlərlə birgə işi inkişaf etdirməyi planlaşdırırıq və bu məsələdə artıq əməkdaşlığa başlamışıq. Hər tələbənin iki rəhbəri olacaq: biri Özbəkistandan, digəri isə Azərbaycandan. Əməkdaşlıq inkişaf edəcək", - o bildirib.

Kudratxocanın sözlərinə görə, hazırda OzJOKU-da Azərbaycandan 100-dən çox tələbə təhsil alır və onların sayı artmaqda davam edir.

"Biz onlarla çox yaxşı işləyirik. Onlar bacarıqlı, ağıllı, yaxşı gənclərdir. Bu il qəbul daha çox olacaq. Tələbələrin sayı ildən-ilə artır", - rektor qeyd edib.

O, tələbə və müəllim mübadiləsi proqramlarını təhsil sahəsində əməkdaşlığın vacib istiqaməti adlandırıb.

"Biz eyni dildə danışır, bir-birimizi başa düşürük, bizi ümumi tarix birləşdirir, gözəl iqtisadi imkanlarımız var. Gənclər bunu hiss etməlidirlər", - Kudratxoca vurğulayıb.