Azərbaycan və Qazaxıstan ikitərəfli və tranzit yük axınının sabit artımı fonunda beynəlxalq avtomobil daşımaları sahəsində əməkdaşlığı gücləndirməyi planlaşdırır.

"MemurTv.az" xəbər verir ki, bu barədə Qazaxıstan Nəqliyyat Nazirliyinin beynəlxalq avtomobil əlaqələri üzrə Azərbaycan-Qazaxıstan Qarışıq Komissiyasının iclasının yekunlarına dair yaydığı bəyanatda deyilir.

Məlumata görə, tərəflər nəqliyyat sahəsində qarşılıqlı əlaqələrin, o cümlədən ikitərəfli və tranzit yük daşımalarının inkişafı məsələlərini müzakirə ediblər. Qeyd olunub ki, Qazaxıstan və Azərbaycan arasında daşımaların həcmi sabit şəkildə artmaqda davam edir və hər iki ölkə beynəlxalq nəqliyyat dəhlizlərinin inkişafında mühüm rol oynayır.

Bundan başqa, Azərbaycan və Qazaxıstan 2027-ci ildən beynəlxalq avtomobil daşımaları üçün kağız daşıyıcılarda olan icazələrdən tamamilə imtina edərək "e-Permit" elektron sisteminə keçməklə bağlı razılığa gəliblər.

"Qərar rəqəmsal texnologiyaların tətbiqi üzrə müsbət təcrübə və beynəlxalq avtomobil daşımalarında elektron icazələrin uğurlu tətbiqi nəzərə alınmaqla qəbul edilib. İclas iştirakçıları qeyd ediblər ki, elektron sənəd dövriyyəsinə keçid inzibati prosedurları azaltmağa, daşıma prosesinin şəffaflığını artırmağa və beynəlxalq daşımaların rəsmiləşdirilməsini sürətləndirməyə imkan verəcək", - qurumdan əlavə ediblər.

Nazirlikdən həmçinin vurğulanıb ki, iclasın yekunlarına əsasən, Qazaxıstan və Azərbaycan nəqliyyat sahəsində əməkdaşlığın daha da möhkəmləndirilməsinə və beynəlxalq avtomobil daşımaları sahəsində tərəfdaşlığın inkişaf etdirilməsinə hazır olduqlarını təsdiqləyiblər.